مشات يام و جات أخرى

.محاولة زجلية لسليكس توصلت بها للتو


الإبتدائي هدا
ادوات, ستيلو, طباشير ومسطرة
فالقسم انظابطو والمعلم نسمعو ونخافو الهراوة
شويا قرايا وبزاف ضحك لعب وحْيَالة
صحاب كتار نظاف و حلاوة
نتعلمو حوايج كتيرة منها الشطارة
و نتمناو نكبرو ونبدلو المستوى

الكوليج هدا
الصحاب تبدلو وصعابت القرايا
البنات ظهرو والتحرميات وهنا بدات المراهقة
و بدا السليت و الكدوب ومشات البراءة
كلشي حاير حتى الموجه والموجهة
و فالنورماليزي الكل يتسنى النقطة
ونتمناو نكبرو ونبدلو المستوى

الليسي هدا
اللي وصلو قلال و اللي دازو قليل للي ختار ما بغى
بدينا نكبرو و ولينا رجال و نسا
اللي مع الحب عندو قصة
واللي تالف مع الرياضة
واللي همو الوحيد التيلاوة
واللي من كلشي شوية
نفكرو فالمستقبل و فاليام الجاية
فأشمن اتجاه الواحد فينا يتلهى
و انخافو نكبرو و ما نبدلوش المستوى

السيب سبي هدا
الفرحة و البزوطاج والضحك نجمعوه ضغية
الدٌييسات و الكولات والليالي البيضة
الدمير والحرف و تا حاجة ما مضمونة
صاحبك يولي عدوك وجارك يتمنى ليك شي طيحة
المستقبل ملعوب بين الزهر والتطياح والنية
و نتمناو الله يعفو علينا من هاد الكية

هادي المدرسة العليا
تفرقو الجمام شي فالمغرب و شي برا
ولكن خوت جداد فالدمة
بروجيات صطاجات ومواد متعددة
اساتذة اكفاء يهضرو بنغمة مبدلة
كبرنا وبدينا نقدرو مكانتنا
و جا اليوم اللي كاملين نتسناو بلهفة
الوالدين الحباب الصحاب كملات الكلسة
تصفيقات وتعناق راه الدبلوم هدا
و ما بقيناش نتمناو حتى حاجة

كلشي تشتت وتلف فالدنيا
اللي داتو الخدمة و اللي مشى مع المرا
واللي مزال مضارب مع القرايا
لكن تجمعنا الجمعية
والتحية النضالية
نتلاقاو فبلوكات لشخصيات ما لها نهاية
نتحاكاو قصص ليلة
والغد ندٌُرو الصفحة

المهم الحاصول هدا
غدا لي معاكم جدٌة
ونتمناو ديما نتلاقاو وتدوم محبة