(طريقي (زَجَل

طريقي طويلة و ناسها مخلطة
حمير غادية و تابعاهم السمطة
كيف المكتاب على الظهور الزبطة
بالحمر دامية و بالزرق مشرطة

طريقي فواحشها باينة منظورة
ما عرفت ناسها فايقة وْلا مسحورة
حاسبين بِلا دنوبهم كلها مغفورة
ايّام مجرورة بايّام حتى لقبورة

طريقي مظلمة و ضوها باهت
الناس الزينة فيها تلفت و تاهت
كلب ورا كلبة يجري لاهت
و الهضرة فيها خسرت و سفاهت

طريقي تصفر خاوية مهجورة
من النسا و الرجال المنصورة
عيالات فيها للدرهم منشورة
و كلمة الرجال ولات معبورة

طريقي مسكين تابع مسكين
لا كلمة زينة و لا قلب حنين
اليد مبسوطة و الدمعة فالعين
الجهل و العيا مطبوع فالجبين

طريقي النفس فيها مقبوضة
كلمة الحق ولات مرفوضة
يا ربي فكها من هاذ الفوضة
و دير شي تاويل ينوضها نوضة

طريقي بغيتها تْولّي طريقك
ليلها ضاوي كنهار طريقك
ناسها صافية كعباد طريقك
رحمني يا مولاي بطريق لطريقك